١. الخدمة
رابط بتعمل مواقع للمشاريع الصغيرة (منيو، أسعار، طلبات) ودعوات إلكترونية. إحنا بنصمّم الموقع وبنرفع المحتوى اللي بتبعتوه، وبنعطيكم لوحة تحكم تعدّلوا فيها لحالكم.
٢. التجربة والدفع
- الباقات الشهرية بتبدأ بـ ٣ أيام تجربة مجانية بدون أي التزام.
- أول شهر سعره ٣٥ دينار (فيه التصميم ورفع المنتجات)، وبعدها السعر الشهري حسب الباقة.
- الدفع بيكون مسبق كل شهر (CliQ أو زين كاش أو كاش).
- إذا ما انْدفع الاشتراك خلال ٤ أيام من تاريخ الاستحقاق، بيتوقف الموقع ولوحة التحكم مؤقتاً لحد ما يندفع، وبيرجعوا فوراً بعد الدفع.
- باقة "اشتريه مرة وحدة" بتندفع مرة وحدة والموقع بصير إلكم، بدون تعديلات أو دعم بعد التسليم.
- بتقدروا توقفوا الاشتراك أي وقت. ما في استرجاع للشهر اللي بلّش.
٣. محتواكم
- الصور والأسماء والأسعار والفيديوهات إلكم، وإنتو مسؤولين إنها إلكم أو عندكم حق تستخدموها.
- بتعطونا إذن نستخدمها بس عشان نبني موقعكم ونشغّله، ولريل الإطلاق إذا وافقتوا.
- ما بنقبل محتوى مخالف للقانون الأردني أو مسيء.
٤. الطلبات والدفع بين المحل والزبائن
- الطلبات اللي بتوصلكم من الموقع هي بينكم وبين زباينكم: الأسعار، التوصيل، الاسترجاع وجودة المنتج مسؤوليتكم.
- رابط ما بتستلم مصاري الزبائن. الدفع (CliQ، زين كاش، كاش، أو بطاقة إذا انفعّلت) بيروح إلكم مباشرة.
- الدفع بالبطاقة و Apple Pay بيكون عن طريق بوابة دفع مرخّصة باسم مشروعكم، وبتنطبق عليه شروط البوابة ورسومها.
٥. التشغيل والمسؤولية
- بنعمل كل جهدنا يضل الموقع شغّال طول الوقت، بس ممكن يصير توقف قصير لأسباب تقنية برا إيدنا.
- مسؤوليتنا بأي حال ما بتزيد عن قيمة آخر شهر اندفع.
- ممكن نحدّث هالشروط، وبنبلّغكم قبل أي تغيير مهم.
٦. الخصوصية: شو بنجمع
- من نموذج طلب الموقع: الاسم، اسم المشروع، رقم الواتساب، حساب الإنستغرام، تفاصيل المشروع، المنتجات والصور والفيديوهات، ومعلومات الدفع بالبطاقة إذا اخترتوها (مثل رقم السجل والـ IBAN).
- من زبائن المحلات: الاسم ورقم التلفون والعنوان/المنطقة وتفاصيل الطلب، عشان يوصل الطلب للمحل.
- لوحة التحكم: اسم المستخدم وكلمة السر (محفوظة مشفّرة، ما حدا بيقدر يشوفها حتى إحنا).
- الهوية: ما بنطلب هوية أو رقم وطني، إلا إذا بدكم تفعّلوا الدفع بالبطاقة و Apple Pay، لأن بوابة الدفع بتطلبها. وقتها بنطلب صورة الهوية أو الجواز على واتساب، بنستخدمها بس للتقديم على البوابة، وما بنحتفظ فيها بعدها.
٧. كيف بنستخدمها وبنحميها
- بنستخدم المعلومات بس عشان نبني موقعكم، نوصّل الطلبات، ونتواصل معكم.
- ما بنبيع ولا بنشارك معلوماتكم مع حدا، إلا بوابة الدفع إذا طلبتوا تفعيل البطاقة، وبموافقتكم.
- المعلومات محفوظة على خوادم Cloudflare، والاتصال مشفّر (HTTPS).
- بتقدروا تطلبوا نسخة من معلوماتكم أو تمسحوها أي وقت، راسلونا وبنمسحها خلال ٧ أيام.
٨. تواصلوا معنا
واتساب: 0796 269 473 · إنستغرام: @raabetjo · إيميل: raabetjo@gmail.com